ភ្នំពេញ៖ សេចក្តីជូនដំណឹងរបស់គណៈកម្មាធិការជាតិ CAMSOC-CAMAPGOC នៅថ្ងៃទី៥ ខែមិថុនា ឆ្នាំ២០២៣ បានឱ្យដឹងថា ចំពោះបណ្ណចូលទស្សនា និងបណ្ណរថយន្ត ត្រូវប្រើប្រាស់ឡើងវិញនូវបណ្ណដែលគណៈកម្មាធិការជាតិបានផ្ដល់ជូនក្នុងពេល ពិធីបើកជាផ្លូវការព្រឹត្តិការណ៍កីឡាអាស៊ានប៉ារ៉ាហ្គេមលើកទី១២ ឆ្នាំ២០២៣ កាលពីថ្ងៃទី០៣ ខែមិថុនា ឆ្នាំ២០២៣ កន្លងមក។

គណៈកម្មាធិការជាតិ CAMSOC-CAMAPGOC បញ្ជាក់ថា ត្រូវមកដល់ពហុកីឡដ្ឋានជាតិមរតកតេជោនៅវេលាម៉ោង១៦:០០នាទីរសៀល ដោយរក្សាទីតាំង កន្លែងអង្គុយដូចដែលមានកំណត់ក្នុងបណ្ណទស្សនារួចហើយ។

គួរឱ្យដឹងដែរថា ពិធីបិទជាផ្លូវការព្រឹត្តិការណ៍កីឡាអាស៊ានប៉ារ៉ាហ្គេមលើកទី១២ ឆ្នាំ២០២៣ នឹងប្រព្រឹត្តទៅនៅថ្ងៃទី០៩ ខែមិថុនា ឆ្នាំ២០២៣ នៅវិមានកីឡដ្ឋាន ពហុកីឡដ្ឋានជាតិមរតកតេជោ ក្រោមអធិបតីភាពដ៏ខ្ពង់ខ្ពស់ សម្តេចអគ្គមហាសេនាបតីតេជោ ហ៊ុន សែន និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន។

គណៈកម្មាធិការជាតិ CAMSOC-CAMAPGOC ក៏អំពាវនាវដល់សាធារណជនជាតិ-អន្តរជាតិ មកចូលរួមទស្សនាពិធីបិទជាផ្លូវការព្រឹត្តិការណ៍ កីឡាអាស៊ានប៉ារ៉ាហ្គេមលើកទី១២ តាមកាលបរិច្ឆេទ និងទីកន្លែងខាងលើឱ្យបានច្រើនកុះករផងដែរ៕